【本報訊】劏場租金平，租戶笑呵呵，但縱使租金上升，小業主就輸錢多。
逾10年前260萬買舖
2005年拆售以來，大部份舖價仍未返家鄉，上月錄得2宗二手成交均蝕讓離場，其中一個距離當年買入價仍差超過40%。一手買入持有至今的業主陳生接受訪問無奈承認當年落錯注，總結4個字：「劏場死梗！」
陳生於2005年以260萬元買入該場一個建築面積約130方呎舖位，他接受電話訪問憶述，當年劏場「㷫烚烚」碰巧途經該處被經紀硬銷，「以為地點好，實質唔係，劏舖都係唔得嘅！嗰時買任何物業，到𠵱家都升啦，但呢度無得升。當初試吓咋嘛，估唔到原來咁……唔得囉！」
他買入劏舖後一直收租，但租期斷斷續續，最長空置近一年，目前舖位都丟空10個月，「以往租客都係個人經營嘅美容、美甲店，非集團式經營，我覺得佢哋搵唔到食喎，我收月租都係6,800咋嘛。我係希望佢哋做得住，但都做唔住」。目前舖位叫租8,000元，實際6,000多元也願租。
他不諱言：「當年落錯注，但唔傷嘅，鬥長命。現在只係綁住，都供甩晒，由得佢啦！就算放賣，個價都去唔返當年買入價，租都咁難租，租金唔起，價都唔起。」10年劏場未翻身，他總結：「劏場死梗！」認為當年炒家將賣價定得高，自己又不知市價，兼且實用率僅低至五成。