聽日就係中西區區議會補選日，東華選區選情好激烈，建制派支持嘅呂錦強同民主黨嘅伍凱欣由頭鬥到尾，噚日兩大陣營仲各自報警，話俾人選舉抹黑同攻擊。
噚日區內呂錦強宣傳單張及橫額上，俾人貼咗好多小單張，話佢搵另一候選人劉舒燕𠝹票，亦有一啲係針對佢個人嘅抹黑，而呂就喺fb話由補選開始至今，佢不斷喺網上被人攻擊及抹黑，選舉宣傳品噚日仲俾人惡意破壞同抹黑，由於事態嚴重，佢同助選團已經報警處理。
不過伍姑娘都投訴，佢話喺般含道麗怡大廈對面嘅橫額，全部俾人拆走晒，有部份仲俾人丟棄在附近山坡，所以佢同助選團亦已經報警處理。
警方初步調查後認為係刑事毀壞，佢亦不點名回應咗嗰啲抹黑呂嘅單張，話呢啲標語同海報影響公平選舉，佢哋亦有再到警署報案，又譴責呢類破壞行為，希望選舉能夠喺公平公正情況下舉行。