國家主席習近平喺十九大報告表明重視大灣區發展，又話要搞香港年輕人工作，除咗特區政府仆到去做，就連一眾富二、三代都齊齊響應號召，呼籲一眾港青去大灣區發展。噚日由人大常委曾憲梓個仔曾智明、新地執行董事郭基煇、同埋霍氏公子霍啟山成立嘅香港廣東青年總會就發表調查，發現好多港青聽都未聽過大灣區，為咗兩地青年多啲交流，佢哋決定下年帶港青去大灣區踢波，真係用心良苦。
倡為港人設內地身份證
身兼香港廣東青年總會常務副主席郭基煇就話，大灣區入面有好多發展機遇，本身成日返內地做嘢嘅佢，話好明白香港人適應內地生活上出現嘅困難，好似因為回鄉證唔同內地身份證，唔可以喺內地開戶口同用電子錢包等，佢就建議內地政府向港人發內地身份證，又建議政府要成立專門為大灣區而設嘅資訊平台，推出手機App或fb專頁，為喺廣東工作嘅青年提供大灣區嘅資訊，好似政府消息、新聞、大灣區內好食好玩資訊等。
至於霍啟山就話，該會明年會舉行足球交流活動，希望最普及同最受歡迎嘅足球比賽，令港青可以接觸大灣區。今次成份研究報告長達80幾頁，除咗會交畀政制及內地事務局同特首辦參考，當然會交埋畀廣東省政府喇，唔係呢班富二代點同阿爺邀功呀？
李八方