唔少退休人士都唔太慣一下子由忙碌嘅工作生活，進入休閒嘅退休生活，好似人生冇晒目標咁，其實網上有唔少資訊都係為佢哋而設，例如退咗休嘅前立法會秘書長吳文華Pauline，專登整咗個網站畀綠齡人士，介紹各種適合退休人士嘅資訊，有興趣嘅朋友不妨睇睇。
原來Pauline退休5年期間，除咗幫立法會寫咗《議事規則》嘅天書外，佢同幾位秘書處舊朋友，例如前法律顧問馬耀添、助理秘書長甘伍麗文等，整咗個叫做「we60」嘅網頁（we60.com），專門為綠齡人士提供各種實用資訊。
八方睇過個網，真係衣食住行、包羅萬有，就以食為例，除咗健康食譜之外，出街食飯都有啲少鹽少糖或者社企餐廳名單。佢哋亦提供咗唔同學校嘅舊生會資訊，方便綠齡人士搵舊同學。最特別嘅係，佢哋連着衫貼士都有，真係犀利。