學校都有「鹹水樓」？冇錯，已建校55年嘅九龍塘學校（中學部）當年興建時，正值香港大旱，承建商以海水拌混凝土建造，如今已變成鹹水樓，導致樓宇結構出現問題，鋼筋嚴重銹蝕外露、四周滲水同石屎剝落，令全校師生都好困擾。一批九龍城區嘅區議員就去信九龍城區議會表達關注，希望教育局派員去學校視察同優先處理該校原址重建嘅申請。
議員喺信中力數九龍塘學校（中學部）嘅「十大問題」，除咗「鹹水樓」，該校校舍為殘舊，連學校禮堂都冇個，牆身老化，土地沉降，導致課室門、消防門、實驗室門都閂唔埋，教師亦要為全年大大小小嘅維修工程疲於奔命。學校最近收到清拆令，自行搭建嘅有蓋地方都要喺今個學年清拆，真係屋漏兼逢夜雨。特首林鄭月娥上場後，講明教育係呢屆政府嘅重點，咁唔知呢間學校又會否引起佢關注呢？