乘「皇巴拜」今季各有問題，簽入尼馬同基利安麥巴比嘅巴黎聖日耳門（PSG）崛起，周三喺歐聯B組主場再以7:1大炒些路迪後，已經打破多蒙特上屆所創嘅歐聯分組賽入球紀錄，而且家陣亦喺各大著名博彩公司，躍升成為歐聯奪冠熱門。
PSG雖然已經提早攞到淘汰賽入場券，但今輪一樣冇留手，雖然開賽56秒就意外先失一球，但尼馬同卡雲尼梅開二度，加埋麥巴比、馬高華拉堤同丹尼爾亦各有進賬，結果反勝些路迪贏得漂亮一仗，而且五輪分組賽入到24球，打破多蒙特上屆射入21球嘅歐聯分組賽紀錄，但因為拜仁慕尼黑另一場亦贏安德列治2:1，所以首名未定；除非落後三分嘅拜仁最後一輪可主場贏PSG四球或以上，但一般估計機會唔大。
由於PSG喺分組賽贏得咁癲喪，足智彩亦更新咗歐聯奪標賠率，將佢哋列為4.5倍大熱，反而分組賽開戰前順序係頭三嘅皇馬、巴塞同拜仁，賠率全部變冷，而緊隨PSG後面嘅次熱變咗係曼城。不過，尼馬賽後就俾西班牙《阿斯報》記者搞到莫名火起，突然問佢幾時過檔皇馬，搞到佢當眾爆粗兼轉身離開記招。
