近排港馬場意外多多，唔係隻馬突然斷腳；就是馬匹出賽期間突然爆血暴斃，好似見習騎師黃皓楠早前俾「嘉福」（已退役）一壓，就此震親條尾龍骨，最少休養兩個幾月。雖然馬會話明未來會加強賽前檢查，預防馬匹自身突然出現毛病，或者換個角度，喺騎師配備方面，亦可以一想改善方法。
須知，現時本港騎師喺陣上只得一個頭盔及護甲保護，墮馬時基本硬食股撞擊力，眼見眾多騎師一墮馬，就好大機會受重傷，相信現時呢套裝備嘅保護性已經唔多足夠。
其實市面上，已經有一款含有Airbag嘅護甲好多年，亦有好多外國騎手響馬術比賽中使用，唔少騎師用完之後，都大讚保護性勝過舊款護甲。
喺2010年，英國馬術騎師Oliver Townend曾試過半隻腳踏入鬼門關，佢當時喺美國出戰一項馬術比賽，跨越其中一條欄嘅時候，不幸墮馬，而佢身體同頭部，更俾馬身壓咗一壓，但因身穿有Airbag嘅護甲，所以得以將傷勢減至最低，只係胸及肋骨出現骨裂情況，事關俾一匹過千磅馬如此壓法，即時壓死都唔出奇。
喺平地賽中唔流行，可能騎師嫌副Airbag護甲太重，影響造磅。其實睇番資料，呢類Airbag護甲大約重2至3磅，同平時嘅護甲只多重一磅，而墮馬時，綁住馬鞍嘅扣一甩，只需0.1秒，啲Airbag就會即時充曬氣，加強保護。
價錢方面，一套Airbag護甲大約400美金至700美金（約3,100至5,505港元），但人命無價，或者有關當局可以諗諗從裝備着手。