12輪西甲過後，估唔到力壓馬德里雙雄排緊第二位嘅，竟然係近年內部頻現動盪嘅華倫西亞，呢個禮拜日主場對巴塞隆拿，難得成為榜首大戰。華倫復興，對西甲係好事，尤其馬體會經過不斷拆骨同埋今個夏天受轉會禁令影響，就算巴塞同皇馬今季明顯冇咁無敵，似乎都難再創2013/14球季嘅高峯，所以呢個任務，今季可能要交到華倫手上。
不過，家陣嘅蝙蝠軍團，會唔會係當日嘅馬體會？雖然小弟幾欣賞教練馬些連奴（圖）喺戰術運用上嘅彈性，但佢手頭上呢班球員，質素同馬體會之前嗰班爭得遠，家陣你見到施蒙尼沙薩踢到曉飛，下半季仲係咪同一個樣，好值得再放長雙眼；另外，安達斯彭利拿同干卡路古亞迪斯呢班新崛起嘅小將，無疑係有潛力，但始終經驗同對局勢嘅觀察都稍遜，到重要時刻唔係擔大旗嘅人選；簡單嚟講，呢隊華倫家陣缺乏一個標誌性嘅新領袖。
華倫家陣贏嘅，好大程度都係一種信心同氣勢，九連勝兼12場不敗，如果今周對巴塞告一段落，之後條路會點，就係一大考驗。小弟唔敢講華倫今季一定係虛火，對佢哋未來都未至於有好大憧憬，因為唔係太信得過一個以利益為首嘅班主林榮福，之前用紐奴同尼維利兄弟做教頭係用人唯親，今次雖然請得到馬些連奴，但後者唔係一個會輕易妥協嘅火爆教練，雙方幾時會出現衝突係未知之數；如果下季缺乏一個長遠嘅規劃，今季嘅心機好大機會被白費，一打歐洲賽後就會產生問題，到時又打回原形。
文：盧卡東尼