建制派成日指控民主派搞流會，噚日元朗區議會，一眾建制派就示範咩叫做搞流會。噚日朝早元朗區議會巴士服務工作小組開會，討論區內新增兩條巴士線，不過包括元朗區議會主席在內嘅5名建制派區議員一早請假，仲有多達14名來自民建聯、工聯會、新民黨，以及鄉事派等嘅建制派區議員突然缺席會議，即使5名民主派區議員全部出席，最後都流會收場，要下次續會討論。
有開會嘅建制派議員話昨早咁多人缺席，係有其他嘢要做。八方發現缺席會議嘅區議員周永勤、梁福元等，都有現身灣仔港區人大代表選舉現場。梁福元接受八方查詢時承認，唔少建制派區議員要出席人大會議，最終趕唔切去開會，要講聲唔好意思喎。不過有民主派區議員估計，咁多建制派缺席，係因為提出多個議程嘅建制派區議員請咗假，所以就索性搞流會，等下次再討論。