早前為免造成民主派互撼，放棄參加東華區議會補選嘅中西區規劃及保育街坊聯盟成員羅雅寧（Katty），噚日一早就現身東華選區，高舉2號手勢，力撐白鴿黨伍姑娘伍凱欣參選，呼籲區內街坊投票支持伍。
Katty話，好希望伍姑娘能夠勝出今次選舉，因為個人同伍姑娘爭取民主嘅理念相同。
加上，伍姑娘一直扎根社區，對東華選區相當熟悉，Katty覺得伍姑娘為人非常誠懇同努力，所以佢好希望街坊可以集中票源，令伍姑娘可以勝出今次補選。
Katty話，對於今次東華補選其餘兩名同區候選人，即係報稱「獨立」嘅呂錦強同劉舒燕非常失望，因為兩人喺剛過去嘅星期日，連今次東華補選唯一一次公開論壇都冇出席，態度相當唔尊重選民，Katty又話，只有伍凱欣出席聽街坊意見喎。