每5年選一次嘅港區人大代表選舉就快舉行，有關嘅選舉會議噚日就第一次開會，想選人大嘅人自然趁呢個小圈子選委齊集嘅機會，盡力爭取曝光同拉票，好似前政制及內地事務局局長譚志源咁，仲帶埋後生仔女啦啦隊到場，但亦有好似中聯辦法律部部長王振民咁，雖然佢唔選人大，一見記者就急急腳轉身走人。
曾蔭權低調現身
噚日灣仔會展一早就已經非常熱鬧，唔少城中猛人現身港區人大選舉會議，好似九龍倉吳光正、信和黃永光等大孖沙均準時現身，現正等候上訴期間保釋嘅前特首曾蔭權都有現身，不過佢就冇好似另外兩個前特首、身兼全國政協副主席嘅前特首董建華同梁振英咁，做主席團成員。
場外都同樣好熱鬧，一班有意參選人大代表嘅人一早霸定好位爭取曝光，好似反佔中律師陳曼琪、律師會前會長林新強、身兼律師會理事嘅自由黨陳曉峰等，等住同選委握手兼介紹自己，其中林新強仲戴埋寫住「請支持林新強」嘅紅色斜帶，慌死選委見唔到。另一個全力拉票嘅譚志源都唔執輸，噚日就晨咁早搵嚟一班後生仔女幫手拉票，仲向到場選委大派卡片同政綱。
有人要爭取曝光，但有人就唔想俾人見到。早前形容反對共產黨嘅人係「花崗岩頭腦」嘅中聯辦法律部部長王振民會議臨完結前，打算搭的士離開，點知遇見守候多時嘅記者，王護法就立即轉身走人。王振民一時手足無措，好在遇到個朋友，佢隨即提出要跟車走人，跟住王振民無回應提問就落荒而逃。
李八方