繼芬姨那句世紀頂胃金句「基本法是我個仔」後,名人才俊照辦煮碗,嘔吐指數再創新高的金句陸續有來,像這些:
「廿三條是我的紅綠燈!」無廿三條的話,佢會追撞死對頭,馬路如虎口,他就是殺手!所以,23條盡快本地立法,大家命仔有保障!姓葉這位歐吉桑,個名有個國字,以「國」字名義殺人,梁振英說了,唔屬於犯法!一廿三,紅綠燈,過馬路,要小心!
「國歌是我屋企個神主牌!」你噓?等於問候佢祖先咯!當然追究到底,求神拜佛咒你柒代無仔生!(有仔生都唔夠票,做唔到人大!)回歸後爭住做威權代言人的范徐,全家唱住國歌,就當拜了習神。MK大媽走音唱國歌跳老舞嗎?強國大媽背景紅得複雜,考起六神無主兼語無倫次的范徐老太,唯有屋企裝多N個神主牌以防萬一!
「一地兩檢合作安排是我的三圍!」陳局長立體嚟睇,是港官中的A貨毛主席,他的三圍數字與合作安排掛鉤,不便對外公開,費事嚇死人!西九割地暗黑協議,變南京條約林鄭版!官員講話唔需要事實,注定會,愈來愈嚇鬼!