講起身高1米98嘅史篤城中鋒高治，大家會諗起乜嘢？今年36歲嘅高治繼早前以51個英超頭槌入球，打破名宿舒利亞嘅舊紀錄榮登「頭槌王」後；周一喺史篤城作客2:2打和白禮頓嘅英超賽事，高治73分鐘落場，第143次喺英超後備上陣，雖然冇波入，但就打破咗佢同艾美奧比一齊保持嘅紀錄，正式成為「後備王」。
143次後備上陣和白禮頓
喺高治嘅職業生涯，唔少領隊都睇中佢嘅身高優勢做Plan B，以高空轟炸搏殺。高治當打嗰陣曾喺利物浦、熱刺等大球會效力，但除加盟紅軍第一季比較多正選機會外，第二季就已經俾新隊友比拿美、古積特壓住，改為擔任後備居多，後尾費蘭度托利斯嚟埋，高治就更加冇位踢；轉到去熱刺又要同羅比堅尼、迪科爾爭位。近年高治年紀越嚟越大，轉會史篤城後好安份咁做吓後備，日積月累成就咗佢呢個英超「後備王」嘅紀錄。
球迷可能認為高治呢個紀錄唔多馨香，事關做球員嘅有邊個唔想踢正選？呢項紀錄似乎有少少尷尬。但高治喺2001年開始已經喺英超搵食，你估要撈足咁多年容易咩？英超球隊一向重視前線增兵，又要抵擋後起之秀嘅衝擊，所以喺英超爭個後備位都唔容易㗎！唔信就不妨望吓「後備榜」排名第二、年紀同高治一樣大嘅艾美奧比，近年已經要去到費列活特、諾士郡等英甲、英乙球會打滾。所以出年一月底就37歲嘅高治，仲適應到英超比賽做埋「後備王」，應該要賀一賀佢囉！
今季入三球份量足
更重要嘅係，高治並唔係刷紀錄咁簡單，佢每次出場真係幫到手㗎！今季高治為史篤城八次後備上陣入三球，做正選嘅祖普莫亭都係入得三粒咋；而且高治三個入球都份量十足，分別助球隊擊敗修咸頓，同兩場後上逼和西布朗、李斯特城，如果冇咗佢史篤城隨時已經喺降班區嗌救命，領隊曉士個位都未必保得住，所以高治呢個後備殺手，都咪話對球隊唔重要呀！