曼聯將於「拆禮物日」喺英超主場迎戰般尼,而英國《太陽報》就爆料,話領隊摩連奴計劃安排球隊喺聖誕節傍晚五點,返到奧脫福球場而唔係去卡寧頓訓練場操練,有受影響嘅職員更發出怨言。報道話,喺卡寧頓訓練場操練需要大約20個工作人員,但改於奧脫福球場操練嘅話,就因為保安同埋要為翌日賽事做準備,需要額外安排大約50人當值。摩佬安排聖誕節正日喺奧脫福操練,意味有更多職員唔可以喺正日陪屋企人。佢舊年都作出過類似安排,但最後就改變主意繼續喺卡寧頓訓練。