窩輪Y急流勇退，在窩輪交易量暢旺時來一個華麗轉身，回家休息三四個月先至決定行止，甚有智慧，做呢行，在場內磨爛蓆，風險好高嘅啫。
AI是否在可見未來主宰市場交易，要睇吓啲大戶（包括一啲對沖基金）是否完全掌握到電腦交易技術，呢方面嘅FinTech（金融科技）日新月異，國際級大銀行投入龐大人才與資金去開發新技術，大學亦要配合，譬如中文大學今年就首創一個「金融科技」學士課程，可說順應潮流，相信未來數年，所有大學嘅MBA課程，都要加入「金融科技」管理呢一科，對電腦訊息工程唔熟嘅學生，讀起嚟會比較吃虧，在中學IB或DSE，學生唔讀好數學、物理，入到大學就難搞啲嘞。
日前午飯後，行經歷山大廈星巴克，見到崇基師弟E啱啱在路邊一張枱坐低，佢首先開口：「大師兄，請你飲杯咖啡吖？」多謝咯，左丁山飲咖啡會心跳，坐低傾幾分鐘則無妨，師弟E話等緊一位朋友，大家傾住先，呢位師弟又係好似窩輪Y嗰款，在銀行、直接投資界甚為吃得開，十年前已經退休，現時正職就係做義工，副業係繼續做投資顧問，憑佢嘅經驗與人脈，搵新投資出路，最新投資係乜呢？師弟E話：「梗係FinTech啦，我地同一個大藍籌公司合資買咗一間外國金融科技公司若干股權，特區政府高官最近都去視察過。」跟住佢講咗一大輪最新科技發展狀況，可惜左丁山係科技盲，聽如一嚿雲，想唔到同是中大經濟系畢業，師弟E對新科技認識比左丁山深入好多。
於是想到，有機會要搵埋師弟E同幾位21世紀中大校友，搞初創科技公司嘅，坐埋一齊，聽吓師弟E分享經驗與投資（直接投資，非股票買賣）都好。
創業初期甚艱難，要碰壁好多次，並非個個都一帆風順，三年內就成為獨角獸嘅，如有師兄師姊無私無償咁指點，對初創企業嘅年青創辦人會得益不少。
肥仔K一位初創公司朋友，就碰上不同之「選擇題」，有時受到「半真半假利好消息」困擾消耗了不少珍貴時間，如師弟E呢類經驗人士肯幫手畀意見，年青創業家會得到好大益處。