【人大爭位】
要數立法會內嘅非一般建制派，身任港區人大代表嘅田二少田北辰肯定上榜，因為佢唔係凡事都會say yes，堅持走開明路線，卻惹建制派爭議，政圈一早流傳部份建制派未必撐田二少連任人大，睇番過去兩屆，田二少確實唔係高票當選。
田二少接受商台專訪時就話，部份建制派覺得佢太過激進，「唔夠建制派」，舉例話早前立法會財委會審議迪士尼樂園擴建撥款時，佢曾經提到「喪權辱港」一詞，觸動部份人嘅神經。
田二少話喎，佢嘅說話方式雖然可以更圓滑，但會堅持走較中間路線，完全明白當中嘅代價。
田二少仲話，港區人大應更多為一國兩制中嘅兩制發聲，除咗可以處理關乎中港關係嘅事，仲可以改變內地做法，憶述曾經提案建議中央取締狗肉節，廣西省委書記其後親自督促官員來港問佢意見，可見外界唔應該視人大為橡皮圖章。