恒生銀行一年一度邀請傳媒人士參加蛇宴，梗係急急應承大公關水哥，話會出席啦。呢日由恒生第三位總裁阿姐，又係慧敏姐主持。鄭總裁來自滙豐，過去幾年駐倫敦，當然比較少吃蛇羹，佢問我地：「今日多謝各位傳媒朋友出席，似係開武林大會，請問你地食過幾多年恒生蛇宴呀？」嘩！有一半人以上話食咗接近20年，歷經鄭海泉、柯清輝、梁高美懿、李慧敏四位總裁年代以至現在，但原來食蛇資格最老嘅係信報老總A姐，佢在利Sir當政年代，已經係博愛堂吃蛇羹嘅常客咯。
每人吃兩碗，已經飽飽，何況還有老虎斑、陳村粉等等。到了二時許，鄭總裁送客，大家盡歡而別，左丁山例牌要行路起碼半小時嚟消化食物，於是搵路行到去IFC二期，見到窩輪專家Y好輕鬆咁行入搭𨋢大堂，即刻叫住佢：「喂，乜今日咁輕鬆，近三點咯喎，個市咁旺你仲未返上去？」窩輪Y笑容滿面，揸住個大信封話：「我唔做嘞，信封裏面就係離職酬金等等，幾好㗎！」今年大市暢旺，近來成交每日過千億，窩輪佔份額20%或以上，窩輪Y間銀行係窩輪Top 3，生意旺場不在話下，趁此時機同公司計數，好和味龍啫。
窩輪Y話：「站在前線十年，已覺得冇乜挑戰性，人生仲有好多興趣嘅唧，不如急流勇退，玩過第二樣。」咁又玩邊科呢？窩輪Y話：「休息三四個月，過完農曆年先至諗啦，香港投資有大把機會。不如得閒去馬場搵你，學吓跑馬！」
未夠五十歲就可以優哉悠哉脫離大銀行，另換跑道，窩輪Y幾令人羨慕，不過過去十年，窩輪市場有激烈淘汰賽，金融海嘯之後，一度陷於冰凍期，17年前幾個窩輪大字號，已退出窩輪市場，不少窩輪專家要提早轉型，三四位窩輪天后回家專心湊仔湊女，好似窩輪Y咁，一路屹立不倒，依家先至自動引退，自願走下高峯，少見也。臨拜拜之前，窩輪Y話：「未來十年係AI世界，炒窩輪嘅對手係機械人，絕大部份trader面臨失業，因為衍生產品愈係複雜愈係結構性，就愈啱類似捉圍棋AlphaGo嘅機械人，人腦人手點夠電腦反應咁快吖。」窩輪Y已係摸透市場嘅零售衍生產品專家，都有啲怕機械人控制市場買賣，不期然令左丁山想起：窩輪散戶點去打敗機械人？