年輕就係要出去見識世界，好似90後Kathy選擇出走韓國，8月隻身飛到首爾，由一個香港打工仔，變成建國大學嘅學生。
Kathy揀喺建國大學讀韓文，係因為前男友喺同一間學校讀醫科，可惜喺Kathy嚟韓國之前分開咗，「我無諗過取消呢個旅程，因為覺得喺香港好似生存，唔係生活，呢個旅程係為自己，唔係為前男友。」無OPPA幫手，Kathy乜都要靠自己，去到首爾頭一個禮拜住民宿，用一個星期搵屋，之後佈置家居，買家私、裝櫃等，都係自己一手一腳搞掂，總算喺9月開學前安定落嚟。
Kathy帶動主播阿仙遊建國大學，去到佢上韓文堂嘅課室，「我哋每日朝早9點上堂，到下晝1點落堂。」又介紹班主任崔老師，崔老師讚Kathy好靚女，「佢好畀心機學習，不過發音差啲，要多啲練習。」
旅行係走馬看花，住落先體驗到當地獨特文化。Kathy每日都搭地鐵返學，就話，「韓國人真係打乞嚏唔掩口，有時地鐵好逼無得走，佢哋真係會對住我咳，惟有側身避！」Kathy住落又發現，韓國人唔係想像中咁有禮貌，好似喺拍攝期間，Kathy入升降機時被道門夾到，當時升降機內有兩位大媽，都無諗住要撳住道門，Kathy好似習慣咗咁笑住話，「佢哋係唔會唔好意思，仲覺得夾你咪夾你囉！」
香港人未必習慣做垃圾分類，而Kathy住落又發現，韓國喺回收方面做得好仔細，佢話，「我朋友唔記得分類垃圾，畀人罰咗30萬圜(約$2100)！」所以Kathy都學習緊做分類，「我屋企得一個垃圾筒，會擺多幾個細膠袋仔嚟分類。」
目前，Kathy以學生Visa留喺韓國，唔可以打工賺錢，不過佢有另類方法，「我玩啲直播app賺錢，可能今個月嘅任務要求每日開播兩個鐘，就可以將收入double。」佢話自己唔算玩得叻，但係每個月都賺到兩萬蚊人民幣。生活費唔成問題，Kathy話暫定喺韓國留半年，尋找人生方向，「雖然有好多嘢未習慣，不過有信心適應到，至少比起喺香港，呢度舒服啲，個人都開心咗。」
Kathy IG：kathy_cheung
《仙遊首爾》重溫：
http://hk.apple.nextmedia.com/enews/animation/kfans/
記者：阿仙
攝影：峰
編審：Kaman
更多娛聞，喺晒《娛果》
http://fb.com/appledailyent