雖然有名大家叫肥仔聰，但前財爺曾俊華政治助理羅永聰，那些年都有過標準身形，原來係入行做記者後，因為好夜先至食晚飯而變得圓碌碌。做記者係佢由細到大嘅志願，可算為理想犧牲色相。
自細包拗頸入辯論隊
現年39歲嘅肥仔聰，如果真係鍾意做記者，何解當年升大學唔揀讀新聞而係去咗港大讀law？「讀完law都可以做記者，但讀完新聞做唔到律師嘛」，又好似好合理咁噃。八方幫肥仔聰利申，據知當年佢要報考PCLL時，就同屋企人講想讀多幾年書，之後真係去咗港大讀碩士噃，但就係讀新聞，邊讀邊喺《明報》做記者，鍾意新聞定法律多啲？答案相當清楚啩。
軒尼詩道官立小學畢業後，中學成為皇仁仔，「曳就唔係好曳，但就好多嘢講囉」，順理成章入埋辯論隊，「其實成班同學都好鍾意拗嚟拗去，好似要拗贏人就好叻咁」。咁係咪成日拗贏？「唔係，因為有好多高手」。
講到鍾意新聞，當然有迹可尋，小學高年級已經愛睇報紙，大個啲就幫手搞過校報，到讀law時花咗好多時間為通識科就社會議題拍片剪片，1999年法律界反釋法黑衣大遊行，佢亦以學生身份拍低歷史見證。
咁點解肥仔聰鍾意做記者，又要入政府呢？「好奇囉！」咁有乜人生體驗吖？「做自由嘅人係最幸福嘅事」。家陣開埋公關公司自己接生意，相信對佢嚟講，都係幸福樂事咯！
李八方
