隨住新泰王哇集拉隆功繼位，已故泰王蒲眉蓬誕辰（12月5日）就變成泰國國慶。
本港泰國僑民同商會12月3日星期日會喺紅磡高山道公園足球場舉行首屆香港泰國國慶嘉年華，到時會有50個攤位，畀大家免費品嚐海南雞飯、豬手飯等泰國地道美食，仲有選美、泰文歌唱及舞蹈表演、佛畫觀賞同法師祈福等，仲有古式泰拳表演同比賽㖭。
活動籌委黃玉麗話，過往前泰王誕辰時為表尊重，活動比較莊嚴，甚少有娛樂活動；𠵱家變成泰國國慶，仲要係新泰王繼位後首次慶祝，所以加入咗不少娛樂節目，預計吸引1,000人參與。
有教泰拳嘅徐家傑就話唔少人以為泰拳係好勝、鬥狠，其實喺泰國係屬「御前比武」表演，希望今次古式泰拳表演可以將當地武術交流嘅文化帶嚟香港。