港大醫學院為慶祝成立130周年，院長梁卓偉親撰新書《大醫精誠》，回顧港大醫學院多年來嘅軼事同歷史。多名杏林中人出席噚日嘅新書發佈會，包括港大醫學院內科學系榮休教授楊紫芝、做過助理院長嘅食衞局長陳肇始等。
梁卓偉話，紀念活動包括出版多本與香港醫療歷史有關嘅書同相冊，佢更親自撰寫《大醫精誠》，將於本月27日發售，每本148蚊。佢講笑話：「食緊安眠藥嘅可以唔使再食，買多本仲可以當枕頭。」
八方搶先睇過，《大醫精誠》共8個章節，細數醫學院前身同發展等，亦邀請多位名人撰文，《明報》前總編輯劉進圖更分享佢2014年遇襲後住院嘅經歷，仲有台灣作家龍應台及才子陶傑等。另外，港大醫學院學生亦特意錄製《杏林遍地》一曲慶祝；而下月17日係慶祝活動閉幕禮，將邀請4,000名校友出席晚宴。