多得「第一先生」林兆波唔任公職，前特首夫人梁唐青儀獲邀續任女童軍總會會長，噚日大家先有幸一睹梁太耍拳風采！
香港女童軍總會一年一度嘅「周年大會操暨頒獎禮2017」噚日舉行，今年大會主題為「飛躍『武』動101，創造『妳』想世界」，以慶祝香港女童軍101周年，今年更設創造健力士世界紀錄環節，以最多人一齊上武術課為目標，幾千個女童軍一齊耍拳，但就算場面幾壯觀，都要有別具代表嘅人物出場點睛，會長梁唐青儀真係當之無愧。
一年前，當時仲係特首嘅梁振英就曾經以香港童軍總領袖身份，着住童軍裝出席大會操，一幕心形敬禮操震撼全場；一年後嘅噚日，梁太一身女童軍制服造型率成千人耍拳，渾身是勁、剛柔並重，唔知兩位CY平時有冇過返兩招？
網民：大媽跳舞
至於網民又點睇，龍蝦太獻技？有網民以「大媽跳舞」嚟形容，唔少網民就異口同聲話，「直頭廖偉雄上身吖！」、「乜太與你？」。換個角度睇，如果林兆波肯任公職，呢次童軍操，佢都會露兩手喎，唔知佢係咪都會堅持要着白襪仔？
李八方