個個都想搞創投，唔通個個都搞到創投咩？現任港區人大代表梁劉柔芬嘅囡囡梁頴宇（Nisa），又真係搞到喎！Nisa近日同啟明創投同事甘劍平獲得AVCJ 2017嘅Venture Capital Professional of the Year，呢個獎幾猛料㗎，過去兩年都由曾經投資眾多知名科技企業如蘋果、Google同WhatsApp等嘅紅杉資本（Sequoia Capital）獲得。
Nisa對獲獎都好意外，感謝團隊支持，佢話創投生涯中最感動係投資再鼎醫藥，並喺3年內喺美國納斯達克成功上市，好多銀行家同投資者都對此大跌眼鏡。至於啟明，據知今年大豐收，短短10個月內就有7家公司上市。
唔知呢次獲獎，有冇為盛傳想選人大嘅Nisa注入強心針，唔理係咪喺西環推薦名單，姑且一戰？