中西區兩席補選下周日（26日）舉行，當中嘅東華選區三人爭一席，標榜「獨立候選人」身份嘅校長呂錦強，獲多名建制派「明星」包括新民黨主席葉劉淑儀、民建聯創黨主席曾鈺成力捧，噚日造勢連出名鍾意同民主派議員開火嘅「衝擊波」陳健波都現身撐場。
助選團瞞身份質問
同一時間，明愛堅道社區中心搞咗個東華補選論壇，呂錦強雖表明唔出席，但助選團卻踩場質問對手、民主黨伍凱欣。
話說個論壇，被指𠝹票劉舒燕冇覆兼冇影；呂錦強助選團成員文志華現身做觀眾，與會者話文席間冇透露呂錦強助選團成員身份，並質問唯一出席論壇嘅伍姑娘，點解要話呂錦強係「假獨立」？話佢應該拿出證據，否則就係抹黑。伍姑娘選團成員莊榮輝見狀隨即申明自己係伍姑娘助選團，並踢爆文志華身份，批評文唔敢露真身。伍姑娘批評呂錦強「扮獨立」係因為呂至今只得建制派支持，卻標榜係「獨立」，指呂隱瞞政治理念，擺明係想呃選票，係誠信問題！