雷神莫雷拉今朝(18日)操馬唔多，反而卻花了唔少時間，在烽火台招呼練馬師蘇偉賢，兩人傾了很久，只見阿Chris蘇指手畫腳，雷神則時而沉靜思考，明顯在研究戰馬搏殺大計。
睇番周日(19日)沙田賽事，這對騎練只合作第九場三班1400米的「同得福」一駒，毫無疑問今朝話題正是圍繞此駒。4歲馬「同得福」今季出道，跑過3仗全配雷神，頭兩場擺前走全勝，上仗突然留後跑，大熱只得季軍，賽後蘇偉賢更被問話，今次無論如何一定被各方吼實，估計雷神必更小心發揮，不會再留得太後，免被抽秤。
「同得福」初跑1400米表面無根據，但母系血統有長力，同母兄長ADVERBS亦在澳洲贏1500米，加上「同得福」獲馬會選為「短途/一哩馬」組別超新星之一，自有其過人之處，雷神、蘇偉賢今朝亦有晒搏殺動靜，估計大有機會重開勝門。