深宵講完長氣電話，手機忽然發燒，不是微熱山丘式㷫㷫哋，而是無情情冷手執個熱煎堆，潛伏的驚青基因於是即刻浮面，新聞那些令人喪膽的爆炸報導搶閘在腦海重播，好漢不吃眼前虧，連忙把它安放在十萬八千里以外，幾乎考慮用旅舍地線打九九九求救。一宿無話，翌日起床機身回復冷靜，但充電不夠五分鐘又試滾熱辣，開講有話病向淺中醫，何況科技盲根本無從判斷未滿兩歲的產品是否已入膏肓，早餐後匆匆做好不能不交的功課，罔顧飯局主持人講明一時入席絕不恭候，決定先帶手機去睇醫生。
老老實實，港島蘋果店我只信任中環嗰間元祖老鋪，銅鑼灣分店店員毫無憐香惜玉心，無冕香港小姐入到去都當你正宗內地大媽辦，吆喝打臉未至於，睇錢份上姑且應酬的態度卻很昭彰，與該公司承諾的優質服務大纜扯唔埋。上到國際金融中心三樓，接待員招呼之有欠專業令人打個突，登記資料方式接近撩交嗌，幸好把脈醫生十分溫柔細心，總算清除全線水準下滑的焦慮。不是歧視女性，而且也的確遇過十分稱職的小妹妹，有紋有路的蘋果哥哥仔始終魅力沒法擋，這次這位身壯力健之餘還真眉清目秀，診斷深入淺出邏輯精細圓滿，色授魂予的基伯簡直無力招架，死心塌地任佢點──老人家最易打發，少少甜頭就甘之若飴，信焉。他說心肝脾肺腎全部操作正常，解釋唔到點解會發燒，指示我返到屋企要盡情放電，等自動熄機後先至再充。意亂情迷的我忽然清醒：咦，唔係話用晒電好傷身咩？哥哥仔即拍心口擔保，偶一為之絕對有益無害。