明年俄羅斯世盃決賽周ready！周三世界盃外圍賽洲際附加賽次回合，秘魯主場出擊，出埋黑魔法下，靠法芬同基斯甸拉莫斯喺上下半場各建一功，以2:0擊敗新西蘭，兩回合計以相同比數淘汰對手，拎到最後一張決賽周入場券，32個參賽席位全部落實，下月一號會進行世盃分組賽抽籤。
又出煙花又落咒搞新西蘭
秘魯同新西蘭喺首回合踢成0:0，周三返去秘魯主場進行次回合，主隊球迷喺賽前簡直無所不用其極，乜嘢古怪招都出晒。有當地巫師喺街頭好似打小人咁，詛咒新西蘭球員；另一招更毒嘅係，喺新西蘭球員入住嘅酒店出面，當地周三凌晨三點半玩放煙花，搞到班球員冇覺好瞓。唔知新西蘭有冇真係受到陰招影響，總之佢哋喺周三次回合賽事表現就唔多掂，最終輸0:2無緣世盃。教練侯臣賽後都話受到對方球迷旁門左道嘅影響：「如果我哋住喺秘魯球員隔籬嘅酒店，相信今場波勝算會高啲，會瞓得好啲。」秘魯為慶祝入決賽周，政府宣佈周四全國放假一日。
秘魯拎到第32張、亦係最後一張2018年俄羅斯世盃決賽周入場券，而分組抽籤嘅種籽檔次亦都已經全部確定（見附表）。決賽周分組賽嘅抽籤儀式，會喺下月一日喺俄羅斯克里姆林宮舉行。32支球隊會分成四個檔次，原則上喺每一個檔次各抽一隊，組成一共八個小組。至於四個檔次點分法，就係按照10月份公佈嘅國際足協（FIFA）世界排名嚟決定，不過俄羅斯因為有主辦國身份，自動被列為第一檔次，其餘七隊就係其他31支參賽球隊中世界排名最高嘅七隊。其餘三個檔次嘅球隊就按排名順序決定。至於抽籤亦有一啲規則，除咗歐洲球隊之外，同一小組唔會有球隊嚟自同一洲份，而每個小組最多只可以有兩支歐洲球隊。
狂牛英軍跌落第二檔次
根據呢個玩法，第一檔次嘅強隊唔少，德國、巴西、葡萄牙、阿根廷、比利時同法國比較惡啃，其他球隊最想遇到嘅應該係波蘭同埋俄羅斯。至於第二檔次對手最想避嘅，應該係西班牙同埋英格蘭。明夏世盃會喺出年6月14日，喺莫斯科上演揭幕戰，決賽就會喺7月15日進行。