今朝早（16日）嘅晨課入面，除咗大摩晒冷，吸引唔少鏡頭外，仲有位外籍練馬師嘅動態都唔惹小，佢就係今季新倉主麥菲文。
今期周日（19日）沙田日賽中，麥廐派四駒上陣，悉數都由唔同騎師主轡，除咗尾場嘅「好吉利」屬巴度外，其餘一律都係澳洲幫，分別有頭場「威德將軍」聯手柏寶，第四場「蓮花巨星」拍祈普敦及第七場「宇宙車神」搵史卓豐。
呢朝早，麥菲文聯同副練余詠詩企喺欄邊一個高位，齊齊睇實「宇宙車神」出操嘅情況，之後仲走落機坪，搵祈普敦、史卓豐同柏寶開大會，大家嘅備戰態度都好認真。
「宇宙車神」屬行機馬意外出事馬匹之一，出事後休息接近大半個月，其後復課快跳一直由祈普敦主理，對上1000米草閘亦有極佳走勢，似乎呢匹馬已經脫離陰霾，今次久休復出，或可為麥菲文於二級賽中帶來衝擊。