基本法委員會主任李飛嚟香港講《基本法》，特區政府就要班中學生睇李飛爺爺講課，睇到班同學仔眼瞓又有、呆晒眼光光又有，咁嗰班有得現場睇李飛爺爺嘅政府高官同建制派人士表現又點？現場咁多人，有冇人響應特首林鄭月娥講，唔想睇瞇埋眼唔睇李飛爺爺講書就唔知喇，但八方見到有人做好學生係咁抄筆記、亦有做逃學威龍，遲到早退。
娥特出口術 小肥張抄筆記
噚日場《基本法》研討會大龍鳳，主角當然係專程由北京飛嚟香港嘅基本法委員會主任李飛爺爺啦！由特首林鄭月娥到一眾官員自然要到場聽書，娥特更加要上台致辭以示隆重，咁娥特講乜呢？原來佢謙稱自己唔係法律界人士，做咗特首後對《基本法》內有關特首嘅條文有咗新體會，真係「書到用時方恨少，事非經過不知難」，曲線捧一捧李飛爺爺呢個基本法委員會主任。
至於其他官員又點？八方見到政務司長張建宗、政制局長聶德權就密密手抄筆記，官場中人話小肥張一向識做，同邊個開會都好，成日會抄筆記以示有專心，咁識做果然係李飛爺爺嘅「好學生」。