話就話成場大龍鳳係為李飛爺爺宣旨訓話搭台，但成個研討會幾個鐘，冇理由要一把年紀嘅李飛爺爺講晒咁辛苦！所以大會有個對談環節，但奇就奇在研討會講基本法，搵行會召集人陳智思做主持、青年事務委員會主席劉鳴煒做嘉賓，仲可以話同年輕人有關，但又點解會搵埋前一哥李明逵、港區人大代表兼眼科醫生林順潮，同埋廣東商會會長彭浩賢呢？
其實台下有基本法委員會副主任梁愛詩、全國人大常委范徐麗泰喺度，搵佢哋講《基本法》仲合適，唔使等林醫生係咁講兩地醫療合作、介紹佢喺內地行醫嘅經歷，難怪有台下人士「放學」後同八方講，個安排都幾九唔搭八。