各位「意粉」終於等到嘞！意大利足總喺周三宣佈，正式將世盃「出局罪人」教練雲杜拿炒魷，結束佢喺意大利國家隊17個月嘅執教生涯。
其實意大利周一喺附加賽出局，60年嚟首次無得玩世盃決賽周，雲杜拿已經中晒箭！不過呢位69歲嘅老人家，似乎非常戀棧權位，呢兩日任由世人怒罵，依然唔肯辭職。喺意國足總宣佈炒佢之前，雲杜拿仲喺電視節目話：「兩年內我只輸過兩場正式比賽！喺意大利40年以來最好嘅成績。」睇得出佢面皮仲厚過本百科全書。意國足總就冇透露接替人選，外界就盛傳𠵱家冇嘢撈嘅安察洛堤、辛尼特教練文仙尼或前主帥干地都有機會接任。