《基本法》委員會主任李飛爺爺來港講基本法，張建宗、聶德權就做「好學生」，不過唔係個個都好似佢兩個咁，八方發現有人打打卡就閃人，好似商務及經濟發展局副局長陳百里就10點06分現身，仲要逗留到20分就走；另外一個遲到早退嘅就係身兼人大嘅體育、演藝、文化及出版界馬逢國喇；兩個人都喺李飛爺爺發言前就閃咗，究竟所謂何事呢？
原來馬逢國並唔係自願做逃學威龍，佢事後同八方大呻，自己去到之後不得其門而入，惟有行番立法會繼續開會。馬逢國話，到場之後工作人員話唔夠位唔俾入，就算人大都冇面畀，八方問佢有冇不滿，佢就話唔想再講，之後嬲爆爆就行咗去。陳百里就話，由於有一條附屬法例即將喺立法會審議，聽完林鄭發言，就趕回立法會standby，並唔係有意走堂架喎！