意大利哭別世盃決賽周，唔少矛頭直指向老帥雲杜拿領軍無能，呢位69歲老帥似乎仲好厚面皮，話自己帶隊成績唔差，唔肯辭職。有報道話雲杜拿係貪圖70萬歐元（約650萬港元）賠償金。
雲杜拿喺上年接替干地做意大利主帥簽兩年約，足總見佢開頭成績幾好，頭10場贏七場，喺八月同佢續約到2020年，人工總值260萬歐元，據講雲杜拿希望至少要收番70萬歐元先肯走。人無恥就無敵，意大利出局，雲杜拿一直唔肯辭職，仲讚自己領軍成績算係咁：「意大利出局我深感遺憾，但我無能為力。」
意大利足總會喺周三開會，商討國家隊教練問題。據報人選包括𠵱家冇嘢做嘅安察洛堤同文仙尼，以及翻兜今季經常被傳會被車路士炒魷嘅干地。
另外，《ESPN》引述，美國因入唔到今屆世盃，想連同意大利、荷蘭、智利、加納搞個失敗者聯盟，喺明夏世盃舉行前先踢比賽，有冇預埋強國先？