香港現役競賽馬最老係九歲，上周三（15日）晚就有李易達馬房「海之濤」，以呢個年齡第十次勝出谷草1000米。事隔一周在同一地點，這晚(15日)有同年紀鄭俊偉馬房的「有情風」在騎師柏寶胯下，爆大冷攻下頭場五班1000米，單Win及組合獨贏A3分別派338及37元。
原由吳定強馬房（已解散）訓練的「有情風」，今季轉至鄭俊偉馬房，在鄭廐頭三次出賽零獎金。呢鋪換上之前從未騎過的柏寶，跑本身首本途程谷草1000米，6檔起步沿途留住跑居七八位，末段從外叠飛撲而前，力壓於外側同樣衝刺凌厲的另一冷馬「雷超」，結果「有情風」贏短馬頭位，成功打開新季兼轉廐後勝門，亦見證柏寶同鄭俊偉季內首度合作上名即贏馬。
「有情風」Win冷至33倍，此駒搭「雷超」構成2,234.5元巨冷Ｑ。
鄭俊偉表示「有情風」以九歲之齡取得頭馬，相信與馬匹本身評分之前減得夠多有關，老馬不用辣操，養精蓄銳，儲埋體力應戰，效果果然更好。
今場由近期紅人梁家俊策騎的「雷超」影相飲恨做二奶，未能打破齋缽，亦令梁家俊未能在出戰下月國際騎師錦標賽的資格上進一步拋離楊明綸，三、四名分別為「要風得鋒」及「勁駿皇駒」，四重彩派25萬幾。