距離俄羅斯世界盃，剩番半年多少少，對於一早出咗線嘅好多球隊，雖然分組又未抽籤，球會賽事又踢到如火如荼，用人點都有啲避重就輕，唔止英格蘭、德國嗰啲焦點球隊多數用新仔，連哥倫比亞、波蘭呢啲球隊都放走好多主力，不過唔代表冇意思，起碼一班二線兵或者新仔有多啲機會踢，總會有得着。
睇番啲出場名單，有好多賽事都嚇親人架，好似波蘭咁，隊長羅拔利雲度夫斯基冇入選，連基祖華克嗰班主力喺友賽墨西哥嗰場都休息，不過就咁令到拿玻里新星施連斯基（圖）等小朋友有機會踢正選，就算佢哋去到世盃決賽周都係打後備多，但係都總算有大賽經驗。
而哥倫比亞仲要去到中國友賽，咁就梗係二隊出擊啦，但係杜雲沙柏達呢啲後生中鋒就有機會喇，你話一個唔好彩令不嬲易傷嘅法卡奧有咩冬瓜豆腐，去唔到俄羅斯，哥倫比亞都未至於冇兵用吖！
而且，其實仲有好多隊波就算出咗線，但成個骨幹仲未執掂，好似阿根廷 同西班牙咁，前者就用美斯連埋阿古路一班主力踢一場，西班牙就更認真話要放棄無鋒陣，之前5:0炒哥斯達黎加，試用艾華路莫拉達打中鋒，連埋大衛施華等一班主力，同今屆喺皇馬風生水起嘅艾斯高都踢大半場夾吓，你話呢兩場波對佢哋冇意思？隨時係佢哋喺世盃嘅正選陣容呀！
文：飛鴻