英格蘭喺世盃外首名出線唔使踢附加賽，今個月國際賽賽期約戰德國同巴西踢熱身賽，戲碼係好勁，但兩場波一個入球都冇。英格蘭唔少主力都冇喺呢兩場波候命，好聽啲就話畀機會新人表現吓，其實有幾多個可以靠一兩場國際賽上到位？領隊修夫基喺半年後帶乜人去俄羅斯踢世盃決賽周，相信佢已經心裏有數。
世盃外圍賽大部份比賽，喺10月已經踢完，只係剩番少部份球隊，喺11月國際賽賽期仲要進行有競爭意義嘅世盃賽事，其他強隊都係踢吓熱身賽，英格蘭喺過去幾日先後0:0賽和德國同巴西，有人認為對住兩大強隊都可以保清白之身值得一讚，但進攻上都係冇亮點。
英軍只係半力出擊，哈利卡尼、史達寧、佐敦軒達臣同迪利阿里等主力球員都冇候命，今次修夫基趁機徵召唔少冇乜國家隊經驗嘅球員，包括羅夫度斯卓克（圖）、祖高美斯、譚美阿巴謙同蘇蘭基等。今次國際賽借機會嚟試陣試新人，對修夫基嚟講無疑係冇乜壞處。
但對於備戰明年世盃決賽周嚟講亦冇乜得着，羅夫度斯卓克喺呢兩場波獲好評，但佢喺水晶宮都係有蜀中無大將嘅感覺，其他好似祖高美斯同蘇蘭基等，喺球會唔係表現一般就係冇乜上陣機會，要入選世盃23人大軍冇乜說服力。英格蘭下一輪踢熱身賽喺下年三月，先後對無緣世盃嘅荷蘭同意大利，到時對手好大機會擺晒新鮮人出戰，修夫基要執靚個陣容，唔係有想像中咁多時間。
文：何西