快活谷今晚（15日）第五場四班1200米，主角係練馬師超級新人王羅富全，佢同法國騎師巴度並肩作戰，憑「紅褲精神」爆冷掄元，巴度亦告打開重臨香港客串勝門。「紅褲精神」投羅廐後初次上名即獲勝，今場單Win及組合獨贏A2分別派253及20.5元。
現年26歲的巴度趁歐洲馬季歇冬，由11月1日開始在港出任公司騎師（即與馬會簽約的馬會騎師），直至明年1月31日為止。巴度於過去的首四個客串賽日內，出賽最佳名次是第三，直至呢場策「紅褲精神」，巴度終於打出身價波，馬兒沿途守後列位置，留放發力時間準確下，直路一衝過晒贏短馬頭位，見證巴度開齋。
羅富全指「紅褲精神」是匹快8歲的老馬，今仗除眼罩重戴羊毛面箍，成功給予馬兒新鮮感，由於負輕磅，因此他主動搵輕磅的巴度幫手，很開心可以助騎師開齋。巴度則謂今場快步速有利發揮，今季重來香港客串，感覺與上季差不多，非常感謝氣勢如虹的羅富全給予他支持，提供頭馬。
「紅褲精神」前後曾四次轉馬房，今季去到羅富全麾下，熱身兩仗後，今戰終打破本身逾年半不勝之悶局，羅富全再將自己的新人王招牌擦得亮麗。
第五場由一對最大冧巴馬包辦連贏，11號「紅褲精神」後上勝出，12號「金剛秀」同樣後追則獲亞軍，三、四名分別是大熱門「友享友賞」及雷神座騎次熱「航天勇將」，四重彩派近一萬五千元。