××女傭，安心聘用，××女傭，融入家中。這句洗腦廣告金句，真能做到嗎？
第一，安心聘用。何謂安心？十個僱主，十一個都會在家中安裝閉路電視，監視僱傭一舉一動。如你老細在辦公室每個角落安裝了閉路電視對住你，也難稱為安心吧？
但如果不安閉路電視，你的確無法安心。畢竟你的小孩、你的家產全部都在傭工手上，像我這種連幫襯代客泊車都會提心吊膽的人來說，只能事事小心。
但矛盾的是，有些僱主逢星期日都會檢查或者監視傭工，出去聚會時有無順手也帶走家中的衣服鞋襪典當出售；但同時星期一，你卻又安心讓傭工帶你的小朋友返學。用人不疑，疑人不用，是否同樣適用於僱傭關係呢？
第二，融入家中，何謂融入？你的Wi-Fi密碼，會和傭工開心share用嗎？
許多僱主都會拒絕，理由是「Wi-Fi不是必然。佢有Wi-Fi便一日到黑打機唔做嘢」。
從打工仔角度出發，如果你老細禁止你辦公時間玩手機上fb，你會否同佢死過？
我的做法是，玩手機無問題，但一定要完成交代的工作，其他時間我才不管你。
但有些僱主是非常不能接受傭工有空閒時間，有例子是咁的，每晚都叫傭工切水果，但全家人甚少享用，原因是，「唔叫佢切水果佢就成晚都無嘢做㗎啦。」好吧，那不如每晚都開一粒榴槤吃，佔用時間會更長。
另一個「融入」標準便是，是否你食乜，傭工也可以食乜？真實例子，僱主好想飲某款老火湯，但又不想煲，原因是，這款老火湯用了一些貴價材料，而她家的傭工，會飲埋一份，僱主因此覺得心痛蝕晒。
朋友勸她，你的傭工會幫你湊女㗎，讓她食好點又何妨？僱主馬上反駁「唔通我食燕窩又要預埋佢一份」？現實的老細，卻通常會請打工仔食死貓囉。