下半年係零售旺季，除咗聖誕、中秋等節日外，一年兩次VIP Day亦係大型百貨公司谷生意嘅重要日子。
一田購物優惠日將於下星期舉行，「一姐」黃思麗（Susanna）舊年着埋羽絨做推廣，今年一田轉攻美少女戰士家居服，問佢會唔會同舊年一樣親身上陣，變身美少女戰士，佢就笑住話「無謂嚇親大家喇！」真係識講笑。
不過華華留意到，上任年幾嘅Susanna近期着衫風格同以往唔同，少咗啲灰灰黑黑嘅顏色，噚日就着咗件鮮橙色上衣。
Susanna回應話，其實衣櫃只得黑白灰，但有次有位「真心朋友」專登打電話畀佢，話佢上鏡塊面「冇乜血色」，提醒佢「一係化吓妝，一係着啲鮮色衫」，佢覺得化妝難度高，所以揀後者。