人民力量前主席袁彌明（Erica）同哥哥袁彌昌（Derek）近年齊齊投身政治，袁彌昌今年更加入新民黨出任政策總裁，兩兄妹政見上都算各走極端。回想青葱歲月，Derek大爆妹妹細細個已經有反叛基因，反而自己因為排中間，培養咗聽教聽話性格，亦令佢走向建制。
三姊弟承父業讀聖士提反
除咗妹妹Erica，Derek仲有個年長5年嘅姐姐。Derek話Erica細細個已經係小美人，眼大大、面圓圓非常得人鍾意，孻女孻心肝，自小就要風得風！排中間嘅則唔太得寵，令佢自細已經學識凡事要聽教聽話。由於袁爸爸出身傳統名校聖士提反書院，所以三姐弟都要「承父業」，小學到中學都要喺聖士提反寄宿，更因為同一家族都喺聖士提反讀書，而被稱為「四大家族」之一喎。
講到學生時期，Derek就自認平凡，反而Erica就自小有反叛基因，中學時就帶領同學仔反抗唔受歡迎嘅音樂老師，都算校內風頭躉。但Erica同家姐一樣高中已經去咗美國留學，大學畢業先返港，Derek就喺港大完成社會科學學士學位，之後喺英國倫敦政治經濟學院修讀碩士課程，2007年喺雷丁大學完成戰略研究博士課程，學歷咁好，難怪會獲葉劉賞識，由民主思路挖角至新民黨成為新愛將。
現年39歲嘅Derek話不同成長環境，令佢同妹妹對政治睇法有唔同理解，雖然細個時因為寄宿同出國讀書令佢哋關係比較疏離，但近年大家都加入香港政圈，之間都多咗交流，形容佢哋以互相尊重為原則，冇試過因為政見唔同而鬧交反面、影響家庭關係喎！
李八方
