周日再有兩支國家隊拎到出年嘅俄羅斯世界盃決賽周入場券，瑞士同埋克羅地亞成為第27、28隊晉級隊伍。瑞士喺世盃外歐洲區附加賽次回合，主場0:0賽和到訪嘅北愛爾蘭，兩回合計以1:0淘汰北愛，連續第四屆闖入世盃決賽周；而克羅地亞就作客希臘同樣打和0:0，兩回合計以4:1淘汰希臘，歷來第五次出線世盃決賽周。
瑞士連續四屆出線
瑞士喺上周四首回合作客北愛爾蘭靠住一個問題12碼，由左閘列卡度洛迪古斯操刀射入，以1:0先下一城。次回合北愛力圖反撲，但係形勢上瑞士依然佔優。今場雙方都腳頭無靈，到咗補時階段先出現驚險鏡頭，差啲要加時作賽，北愛嘅莊尼伊雲斯頭槌攻門，瑞士門將恩尼森馬出迎但係撲空，好彩列卡度洛迪古斯再做國家英雄，及時護空門，最終兩隊次回合踢成0:0，總比數瑞士贏1:0，有驚無險拎到決賽周入場券。賽後後衞比哈美喺個人社交媒體上載更衣室慶祝相，仲話：「如果你知道呢次係我哋第四次入決賽周，你會笑出嚟，我哋入到2018世界盃！」
希臘慘食詐糊
而克羅地亞喺上周四首合回已經以4:1炒希臘，今場次回合作客就算輸兩粒，都可以照出線。不過「格仔兵」冇鬆懈，比列錫喺43分鐘遠射中柱，差啲將領先優勢擴大。換邊之後，希臘冇放棄，努力進攻，但係「格仔兵」守得出色，諗住希臘可以入番球挽面子，喺79分鐘後備上陣嘅柏卡斯補射破網，不過佢越位在先，入球無效，空歡喜一場。最終兩隊次回合賽和0:0，克羅地亞總比數贏4:1，第五度晉身世界盃決賽周。雖然莫迪歷喺比賽處理死球嗰陣，畀希臘球迷用激光騷擾，但係無阻「格仔兵」贏波好心情。賽後克羅地亞足總喺官方社交網上載球員同埋職員嘅大合照，仲開晒香檳慶祝。
