政務司司長張建宗噚日中午喺灣仔，冒雨現身一架類似美食車嘅展覽車旁邊，為嘅唔係食晏，而係要支持社創基金「社創流動」互動展覽車開展禮。肥仔張話希望呢架展覽車，能夠將創新創意理念推入社區，之後仲同社創基金小組主席張仁良上車，試玩3個互動專區遊戲。
小肥張試玩一個用嚟提升有特殊學習需要學生學習經驗嘅體感遊戲時，示範隔空將放喺不同位置嘅1至16號數字，順序排番出來，其間佢不斷出掌，好似耍太極咁，好快就排好咗。但肥仔張最關心嘅似乎係：公帑點用？玩完後即追問部體感遊戲機要用幾多錢，又問架展覽車要幾錢。
張仁良就喺車上試戴反映白內障患者視野嘅眼鏡，再被要求喺巴士站嘅牌搵出特定車站位置，過程順利，佢自爆之前都做過白內障手術喎。