唔少人講起轉工、嫌自己人工低時，總會有人建議不如「轉行做扎鐵」，皆因日薪高達2,400蚊，一星期即使只返5日，一個月都有逾5萬蚊收入，令唔少人都好感興趣。屬於職工盟嘅「紮鐵業團結工會」近排就透過一條短片，講番呢個唔少人認為「高薪」嘅由來，一場扎鐵工人罷工運動原來已經十周年。短片仲話埋畀大家知，一條鐵最重可以去到幾重？原來係400磅，所以唔係人人都做到，普通人真係識條鐵！
短片搵番10年前扎鐵工嘅罷工發言人黃惠民、參與罷工嘅工人冼榜祥，講番當年點解罷工嘅心路歷程。黃惠民話當年扎鐵工人分享唔到經濟繁榮成果，決定走上街頭抗爭，冼榜祥則指若唔係當年發起罷工36日，相信今時今日扎鐵工人嘅工資水平，仍然停留喺冇尊嚴嘅待遇。
職工盟呼籲工人要更團結，打工仔唔好擔心加入工會，要為自己、為行業，爭取合理嘅工作待遇。