曾經係政黨新思維成員，其後退黨嘅藝員兼泰拳教練黃澤鋒，原來同工聯會立法會議員麥美娟（Alice）「不打不相識」。Alice喺facebook上載短片，片中黃澤鋒以「娟妹」稱呼Alice，原來佢係Alice嘅泰拳教練。
黃澤鋒話娟妹以前「健碩啲」（又幾識講嘢喎！），打泰拳後真係瘦咗好多。Alice就自爆冇刻意減肥，只係因為早前有胃病，要提早開飯兼戒食至愛嘅宵夜車仔麵，所以至瘦咗，仲冇埋胃病。咁點解要學泰拳？Alice話早前有班朋友學泰拳後，佢覺得好型而想學，學咗幾堂後，覺得真係幾好，自稱份人好心急，鍾意啲快嘅嘢，所以鍾意泰拳嘅速度。剛過咗46歲生日嘅Alice笑言：「我咁嘅年紀仲學到打泰拳，算係咁啦」。