皇家馬德里球星基斯坦奴朗拿度（C朗）禮拜日喺社交平台報喜，透露佢同女友佐真娜嘅首個愛情結晶品、囡囡Alana Martina已經出生，亦都係C朗第一個非代母所生嘅小朋友，𠵱家C朗已經有兩仔兩女喇！
C朗喺社交平台上載自己同大囝小C朗喺佐真娜床邊嘅合照，而佐真娜就抱住啱啱出世嘅愛女，一家笑容非常幸福。第四度做老竇嘅C朗話︰「Alana Martina剛出世！佐真娜同Alana都非常好！」不過C朗大喜日子有人攞景，21歲葡萄牙模特兒兼真人騷藝人Natacha Rodrigues話C朗襯佐真娜大肚期間，同佢發生一夜情。據英國《太陽報》話，美臀Natacha兩年前已同C朗喺ig相識，到今年3月26號，Natacha去C朗屋企激戰，除咗佢睡房以外嘅全部房都做過愛，仲拎走一頂帽留念，唔知堅定流嘞！
傳C朗失金球獎
另外，有傳C朗爆冷失落下月七號頒嘅金球獎，皆因網上流傳《法國足球》雜誌寫住「2017金球獎」嘅封面係美斯，不過亦都可能係雜誌整定幾個版本方便發行咋。