新一屆港區人大代表選舉下月底舉行，呢個係極小小小圈子嘅選舉，民主派要當選，機會近乎零，只剩建制派圍威喂，但要突圍則要獲中聯辦祝福，故此每逢選舉前都有西環推薦名單出爐，政界有傳鄺美雲都榜上有名。
鄺美人本身係江西省政協，呢次轉戰人大，唔通想一試選舉（雖然唔係真嘅……）嘅滋味？佢噚日出席活動時證實，準備好向選委拉票，希望當選為港區人大代表，透露已經有選委話撐佢。但話冇聽聞有中央祝福嘅名單，因為有參加社團組織活動，所以都要同中聯辦聯絡。
要獲西環點燈，當然要出下力，鄺美人早前已拍片撐《國歌法》，唔知呢條片，會唔會為佢帶嚟選票？佢回應《國歌法》時話認同自己嘅國家係必須嘅，但唔評論應唔應該有追溯力，相信立法機構會研究。