樂施毅行者2017會喺周五至日舉行，發展局局長黃偉綸（圖）喺網誌撰文話當年，透露參加過4次毅行者，之後做過多年義工。佢第一次參加毅行者係1991年，當年同幾位隊友報名一試湊熱鬧，其後因為其中一位隊友血壓偏高，自己又因運動導致膝蓋韌帶斷裂，就改以義工身份繼續參與。
話有助提高EQ
佢透露2000年擔任7號檢查站（鉛礦坳）指揮官時，發生咗一件難忘事，當日開賽時風和日麗，但中段天氣急劇惡化，狂風大雨，氣溫仲急降至不足10℃，因為上山路滿佈泥濘，舉步艱難，笑言「嗰次我覺得難過去立法會」，而且有選手有低溫反應，佢向大會報告情況，結果腰斬賽事。佢話呢件事令佢體會「天有不測之風雲」，而參加毅行者最重要挑戰自己同埋學習團隊精神、待人接物。