健身絕對唔係男士嘅專利，其實女士都一樣可以做到！俄羅斯26歲女運動員古妮蘇娃（Nataliya Kuznetsova）由14歲開始舉重健身，12年間體重由當年的88磅，升至依家嘅198磅，手瓜腳瓜全部起腱，簡直就係女版侯克。
古妮蘇娃以臥推（bench press）170公斤以及硬舉（deadlift）240公斤創造世界紀錄，而佢其實喺上年已經退咗役，但依家就「守唔到寡」宣佈復出。佢話除咗會繼續健身，依家仲會充當教練，鍛鍊一啲有潛質嘅人。
「啲人一定認得我，我身材fit到就算有着衫都會show晒出嚟。好多人都搵我合照，仲有好多人都知我叫咩名。」古妮蘇娃話，復出之後為咗keep返個身形，佢每日都會操幾個鐘頭同埋嚴格控制飲食，而食物亦都唔會加任何醬汁，只會加高蛋白粉。
古妮蘇娃健身健到出晒位，佢嘅Instagram戶口已經有19萬人follow。當然女仔之家練到咁大隻就一定會有閒言閒語，但古妮蘇娃就一於少理，實情話「我覺得每個女人都係性感嘅！」