立法會最近有一股火氣，由前特首梁振英引起，皆因調查梁振英收取澳洲公司5,000萬嘅專責委員會邀請CY出席委員會交代兼提供相關資料同文件，但CY拒絕赴會，激到一班委員紮紮跳，有委員預告要用《特權法》傳召CY㖭。唔知係咪自覺有全國政協副主席呢個護身符？CY噚日被傳媒問到點解唔出席立法會交代時，從容自若，微笑封嘴，八方只諗起佢上周喺一個論壇講到辱國歌國旗問題時，「大義凜然」咁講咗句：為官避事平生恥……
採訪安排親疏有別
查實CY噚日係出席「全球化智庫」香港委員會舉行嘅成立儀式，喺大堂被傳媒捕獲。主辦單位其實都同CY「理念一致」，因為採訪活動都親疏有別，只准獲邀名單上傳媒如《人民日報》、《文匯》、《大公》、《商報》、《南早》、TVB等入場，《蘋果》、港台、有線等多間傳媒未獲邀，只可以喺大堂追訪。
而CY噚日到場後，當然被問到點解冇配合立法會調查啦，但佢從容不迫咁面露笑容拒作回應，繼而喺「梁粉」陳啟宗同保安護送下入場。而佢離開時，傳媒繼續追問佢點解冇向立法會調查委員會提交要求嘅文件、點解拒絕出席聆訊，佢展示一貫CY式笑容，然後喺保安護送下上車離開。
李八方