夏日求驗客：盧卡古英超啞火怨冇輸送

背負7,500萬鎊身價嘅曼聯前鋒盧卡古，雖然喺比利時國家隊繼續有波入，但近期喺球會就陷入入球荒，佢喺曼聯各項賽事已經連續七場冇波入，直到上周六代表比利時國家隊友賽墨西哥先至梅開二度。英國《太陽報》引述消息話，紅魔上周日英超作客以0:1輸畀車路士後，盧卡古就大發雷霆，仲埋怨隊友話自己冇波入係因為唔夠輸送。

得閒普巴又變髮

其實紅魔領隊摩連奴呢排都幾頭痛，唔單止盧卡古入唔到波，主力後衞菲爾鍾斯喺周五代表英格蘭友賽德國時更整傷腿筋，只係踢咗24分鐘就退下火線，最後宣佈因傷退隊，嚟緊周六主場對紐卡素嘅英超踢唔踢到都係未知數。而另一傷兵保羅普巴就闊佬懶理，佢趁國際賽空檔又去咗剪頭髮，仲換咗個新髮型。
之前有英國傳媒話過，如果摩佬想喺一月轉會窗買人，就要先將隊中冗員賣走，據傳第一個被踢走嘅可能就係中場費蘭尼。紅魔據報已經同比錫達斯傾掂數，喺一月會以800萬鎊將明年六月約滿嘅費蘭尼賣畀呢支土超球隊。